मिथिला रंग महोत्सव-२०१७

मैथिली लोक रंग (मैलोरंग) द्वारा दिल्ली एन.एस.डी. केर सम्मुख सभागार मे दू दिवसीय मिथिला रंग महोत्सवक आयोजन कएल गेल. पहिल दिनक आयोजनमे ०४ दिसम्बर,२०१७ क’ संस्था द्वारा प्रत्येक वर्ष एक वरिष्ठ रंगकर्मी ओ एक युवा रंगकर्मी कें रंगकर्मक क्षेत्र मे विशिष्ट योगदान हेतु क्रमशः ज्योतिरीश्वर सम्मान एवं श्रीकांत मंडल सम्मान स’सम्मानित कएल जाइत अछि. एहि बर्खक ज्योतिरीश्वर सम्मान-२०१७ वरिष्ठ रंगकर्मी उमाकान्त झा(भंगिमा,पटना) एवं श्रीकान्त मंडल सम्मान-२०१७ रंजीत कुमार झा (मिथिला कल्याण परिषद,रिसड़ा,कोलकाता) कें देल गेल.

आजुक आमंत्रित अतिथि छलाह एन.एस.डी. केर वर्तमान निदेशक प्रो. वामन केन्द्रे एवं एवं मध्य प्रदेश नाट्य विद्यालय,भोपाल केर निदेशक संजय उपाध्याय. अतिथिक सम्मान केलनि क्रमशः प्रसिद्ध नाटककार महेन्द्र मलंगिया एवं वरिष्ठ लेखक गंगेश गुँजन तदुपरांत दुन्नू अतिथिक हाथे दुन्नू चयनित रंगकर्मी कें सम्मानित कएल गेल. मंच सञ्चालन केलनि प्रो. देवशंकर नवीन.

सम्मान सत्रोपरान्त कवि शेखराचार्य ज्योतिरीश्वर ठाकुर रचित धूर्तसमागम केर मंचन कएल गेल. प्रस्तुति आलेख एवं निर्देशन छल डॉ. प्रकाश झा केर एवं सहायक निर्देशन छल श्याम कुमार सहनी केर. सभागारक प्रवेश द्वार पर सभसँ मुख्य आकर्षण छल श्याम सहनी द्वारा थर्मोकोल स’ बनाओल गेल महाकवि विद्यापतिक प्रतिमा. महिला रंगकर्मी द्वारा बनाओल गेल अरिपन,सामा-चकेबा, गामक परिकल्पना मे टांगल सूप,चंगेरा आ मिथिलाक विभिन्न ऐतिहासिक स्थलक फोटो एवं मैलोरंग प्रकाशन स’ प्रकाशित विभिन्न मैथिली पुस्तकक स्टॉल सेहो नाटक देखय आएल प्रेक्षककें आकर्षित करैत रहल.

दोसर दिन मने ०५ दिसम्बर,२०१७ क’प्रथम सत्र मे श्याम सहनी निर्देशित हिन्दी नाटक ‘रिफंड’ केर सफल मंचन भेल. संध्याकालीन सत्रमे मैथिलीक वरिष्ठ रंगकर्मी ओ लेखक डॉ. कमल मोहन चुन्नू केर नाट्यालोचनाक पोथी निनाद केर लोकार्पण भेल. उक्त अवसर पर पोथिक विषय-वस्तु ओ आलेख पर समीक्षा केलनि प्रो. देवशंकर नवीन संगहि एहि पोथिक सार्थक उपयोगिता पर तार्किक ओ महत्त्वपूर्ण विचार रखलनि मैथिलीक प्रसिद्ध नाटककार महेन्द्र मलंगिया. पोथी लोकार्पणक पश्चात बारहमासाक नाट्य प्रस्तुति एकादशीक मंचन भेल . प्रो. हरिमोहन झा केर कथा संग्रह एकादशी केर तीन गोट मुख्य कथा क्रमशः घर-जमाय, तिरहुताम आ ग्रेजुएट पुतोहु केर नाट्यांतरण आ नाट्य निर्देशन केलनि मुकेश झा.